НЁБДІНСА ВИТТОР (В.А.САВИН) СЬЫЛАНКЫВЪЯС

Унаысь ме сьывлывлі,
Йӧзсянь "аттьӧ!" кывлывлі;
Пӧлянӧн моз чипсася,
Йӧз сьӧлӧмӧ чуксася

Коми сьыланкывйӧн.

Менам сэтшӧм оланног:
Овлӧ гажа, овлӧ шог.
Гажа дырйи — ворсышта,
Гаж кӧ бырӧ — шогсьышта

Коми сьыланкывйӧн.

Сё майбырӧй, олӧмӧй,
Гажа муын дзольгӧмӧй!
Пӧрысьма кӧ — ланьтышта,
Олӧм жальӧн казьтышта

Коми сьыланкывйӧн.

Сьылӧм менам оз на быр,
Кувтӧдз кута сьывны пыр.
Коми йӧзӧс гажӧда,
Шогсӧ налысь пальӧда

Коми сьыланкывйӧн.

Кор ме сьыла — воссьӧ юр,
Пыр ме сьыла мый мед бур:
Лёка олӧм "вуштышта",
Бура олӧм ошкышта

Коми сьыланкывйӧн.

Кывзӧ, бур йӧз, сьылӧмсӧ,
Став олӧмсӧ–вылӧмсӧ;
Олӧ пыр бур сьӧлӧмӧн —
Нэм коллялӧ сьылӧмӧн,

Коми сьыланкывйӧн.

Эг ме аддзыв некор море,
Эг тӧд сылысь сьылан гор.
Зэв пӧ паськыд синьӧй море,
Абу некӧн пом ни дор.

Эг ме аддзыв некор море,

Зэв пӧ паськыд — пом ни дор.

Меным тӧдса коми море —
Помтӧм–дортӧм паськыд вӧр.
Кыпыд гажӧн уджӧ корӧ,
Сійӧ — олан гажлӧн шӧр.

Кыпыд горӧн уджӧ корӧ

Помтӧм–дортӧм паськыд вӧр.

Зэв пӧ гажа гыа море,
Зэв пӧ мича, кодыр лӧнь.
Век пӧ гажа сылӧн морӧс,
Оз и ланьтлы некор скӧнь.

Али гажтӧм коми море?
Али мисьтӧм сылӧн сер?

Сэні юргӧ олӧм дорӧм,
Сьылӧ пила, ворсӧ чер.
Гажа миян коми море,
Сьылӧ пила, ворсӧ чер.

Зэв пӧ джуджыд ыджыд море,
Зэв пӧ сылӧн ыджыд вын:
Кор пӧ шлывгӧ из креж дорӧ,
Сэк пӧ гӧгӧр мургӧ гым.

Зэв пӧ джуджыд синьӧй море
Зэв пӧ сылӧн ыжыд вын.

Али вынтӧм коми море?
Али лажмыд сылӧн шӧр?

Мед эз личав выль мир дорӧм —
Страна корӧ тырмыд вӧр.

Гора ызгы, зарни море!
Коми мырсьысь, зіля вӧр!

Мича нывъяс Эжва дорӧ

Лэччисны.

Бурлак зонъяс нывъяс бӧрся

Вӧтчисны.

Пыжӧ пуксисны, мӧдӧдчисны сынны,

Горӧдісны сьывны.

Зэв гажаа сьылӧны.

Тӧвру пӧльыштӧ, мӧвкйӧдлӧ ва вылын...
Мӧдлапӧв зэв ылын,
  Визув ва кылӧдӧ.
"Мича нывъяс, зільджыка нӧ
Сыныштӧй!"
"Бурлак зонъяс, пелыснаныд
  Кутыштӧй!"
Эжва вуджисны, веж видз вылын долыд,
Радлӧ весиг лолыд.—
Майбырӧй, олӧмӧй!
"Мича нывъяс, босьтчылӧй нӧ
  Йӧктыны!"
"Оз тай, зонъяс, майбырӧй, ков
  Тшӧктыны!"
Гажа ворсӧны, сьӧлӧмъясныс бурмӧ,
Ягын, кылӧ, юргӧ
Бӧрсяньыс йӧла шы.
"Мича нывъяс, гажа жӧ нин
Олӧмыд!"
  "Бурлак зонъяс, ӧтчыд овлӧ
  Татшӧмыд!"
Майбыр, гажа кад, мед эськӧ эз помась!
Гажӧдчӧй, кор томӧсь,
  Мӧдысь ӧд оз нин во!

Из ю дорын, веж луд вылын
Гоннялӧны дзоридзьяс.
Югыд гӧрда–лӧза рӧмӧн
Дзирдалӧны зарнияс,
Зарнияс.

Гажа ваксьӧ ортса сынӧд,
Лолалӧ пӧсь чӧскыд дук.
Ворсӧ нимкодьысла вирыд,
Сьӧлӧм йӧктӧ юк да ёк,
Юк да ёк.

Нывка сьылӧ, бурлак ворсӧ—
"Котӧрті да которті"...
Сынӧд гыяс кузя киссьӧ,
Юргӧ гора йӧла шы,
Йӧла шы.

Бурлак гусьӧникӧн шуӧ:
"Нывка, нывка, кылян он?
Муса Танюк, збыль ӧд шуа:
Моиам тэтӧг оз лок ун.
Оз лок ун".

Рӧдник лыа пиын бульгӧ,
Топта узьӧ джуджыд сён.
Кутчысьлӧны бердысь–бердӧ,
Окасьӧны ныв да зон,
Ныв да зон.

Из ю дорын веж луд вылын,
Гоннялӧны дзоридзьяс.
Югыд гӧрда–лӧза рӧмӧн
Дзирдалӧны зарнияс,
Зарнияс.

Чужи, быдми сьӧд вӧр шӧрын,
Деревняысь петі;
Новлі чорыд сера дӧрӧм,
Визя гяч да кӧті.

Муртса сувті ас кок йылӧ,
Удж пыр меным вичмис:
Зыбка дорын ӧввӧ сьывны,
Ичӧт кага видзны.

Кага бӧрдӧ, ачыд бӧрдан,
Гораджыка горзан.

Бӧрдысь кага дыр оз бурась,
Абу сылӧн ланьтӧм;
Керка ӧдзӧс швачкан бура,—
Пышъян ворсны няйтӧн.

Ыджыд мамыд корсяс тэнӧ,
Юалас: "Кӧн вокыд?"
Вӧсньыд ньӧрйӧн шлачкас сэки,—
Луддзас кыкнан бокыд.

Сэтшӧм вӧлі челядь вояс,
Казьтывла на ӧнӧдз.

ЧУЖИ, БЫДМИ

Тадзи сьылӧны В.Савинлысь "Чужи быдми"  Коми–пермяцкӧй национальной округын

Чужи, быдми сьӧд вӧр шӧрын, да ой, сьӧд вӧр шӧрын,
Деревняысь петі.
Новли чорыд сера йӧрнӧс, да ой, сера йӧрнӧс
Да нинкӧм бырӧті.
Сувті, тальччи ас кок йылам, да ой, ас кок йылам,
Ичӧтсянь уджалі.
Кӧр кватьӧдзлам вӧлись волі, да ой, вӧлись волі,
Пыр ме пестуналі.
Кага горзӧ, ачыт горзан, да ой, ачыт горзан,
Пыр сійӧ бурӧтан:
Пӧжӧм йӧлӧн сюрысь вердан, да ой, сюрысь вердан.
Зыбка пыр гыччӧтан.
Горзысь кага дыр оз бурась, да ой, дыр оз бурась,
Оз и воть онмовссьы.
Керку ыбӧс гымган бура, да ой, гымган бура.
Петан тэ котрасьны.
Рытнас мамӧ гортӧ локтас, да ой, гортӧ локтас,
Шуас: "Кытӧн вокыт?"
Вӧснит шатьӧн швачкас тэнӧ — да ой, швачкас тэнӧ.
Лудас кыкнан бокыт.

Вӧрӧд–ягӧд ветлывла,
Рыжик–ельдӧг вотлывла.
Тшак вотыськӧд аддзысьла,
Гусьӧникӧн кутчысьла.
Вотчигтырйи вочасьла,
Зэв топыда окасьла.

Чери кыйны ветлывла,
Сьӧкыд тӧня кыскавла.
Войковъясӧн ветлігӧн,
Бипур дорын узьлігӧн,
Зэв топыда кутчысьла,
Тывъясьыськӧд окасьла...

Рытын борйӧ ветлывла
Чӧскыд дука турунла,
Ытшкывла да лэчтысьла...
Мусукӧйкӧд аддзысьла,
Небыд борйын кутчысьла,
Зэв чӧскыда окасьла.

Войяс пукны ветлывла,
Ныв–зон костын ворслывла,
Йӧктывла да сьывлывла,
Вой шӧр бӧрӧдз овлывла.
Колльӧдчигӧн кутчысьла,
Зэв топыда окасьла.

Со ме кутшӧм долыда
Том олӧмӧс колльӧда!
Мӧдысь, гашкӧ, казьтыштла,
Шог пыр нора сьылыштла:
"Кольӧма тай, мокасьтлы,
Кыдзи коркӧ... окасьлі!"