КОМИ ЙӦЗКОСТСА СЬЫЛАНКЫВЪЯС  лӧсьӧдіс П.И.Чисталев, 1984.

 АСЪЯ КЫА

Асъя кыа, кыа водз лэбалӧ,
Лэбалӧ да, рытъя кыа,
Рытъя кыа, кыа сёр лэбалӧ,

Лэбалӧ да, ва вылын пыжаяс,
Ва вылын пыжа, пыжаяс кывтӧны,

Кывтӧны да, сынысьясыс да бӧжалысьясыс,
Сынысьясыс да бӧжалысьясыс том молодечьяс,

Том молодечьяс да, пыж шӧрын пукалысьяс,
Пыж шӧрын пукалысьяс мича нывъяс,

Мича нывъяс да, найӧ сьылӧны,
Найӧ сьылӧны да шога, шога,

Шога, шога да, ва дорын ныв гуляйтӧ,
Ва дорын ныв гуляйтӧ да и бӧрдӧ,

Да и бӧрдӧ да, кокас тюпель,
Кокас тюпель да бӧрвылас талялӧ,

Талялӧ да, юрас чышъян,

Примечание: По названию этой песни с 1978 года был назван  Государственный ансамбль песни и танца Коми АССР "Асъя Кыа"

Юрас чышъян, чышъянсӧ вошталӧ,

Вошталӧ да "Этійӧ чышъян,
Этійӧ чышъян, чышъян мен абу жаль,

Абу жаль да, меным сӧмын жаль,
Меным сӧмын жаль аслам муса другӧй".

АЛӦЙ ЛЕНТОЧКА

Менам вӧлі алӧй ленточка,
Воши сійӧ озъя тылаӧ.

Менам вӧлі гӧрд шӧвк ленточка,
Воши сійӧ пувъя ягӧ.

Менам вӧлі лӧз шӧвк ленточка,
Воши сійӧ чӧдъя раскӧ.

Менам вӧлі виж шӧвк ленточка,
Воши сійӧ мырпома нюрӧ.

Менам вӧлі еджыд шӧвк ленточка,
Воши сійӧ яла ягӧ.

Менам вӧлі сьӧд шӧвк ленточка,
Воши сійӧ сьӧд вӧр шӧрӧ.

Менам вӧлі муса, муса друг,
Уси сійӧ война вылӧ.

УНА НЫВЪЯС ЧУКӦРТЧИСНЫ

Уна нывъяс чукӧртчисны,
Зон–зон, муса нывъяс,
Зон–зон, мича нывъяс
Чукӧртчисны.

Эжва дорӧ лэччалісны,
Зон–зон, муса нывъяс,
Зон–зон, мича нывъяс
Лэччалісны.

Купайтчыны мӧдӧдчысны.
Паськӧмнысӧ пӧрччалісны.
Асьныс ваӧ чеччалісны.
Ёна сэні сёлькӧдчисны.

Василиса прӧстудитчӧма.
Бӧльничаӧ нуисны.
Лекаръясыс эз бурдӧдны.
Муса другыс бурдӧдіс.

ГӦРА ЙЫЛЫН ОЗ ВЫЙИМ

Гӧра йылын оз выйим,
Гӧра йылын оз выйим,
Оз выйим, оз выйим,
Мича нылӧй, Машӧй, оз выйим.

Гӧра йылын оз вотӧ,
Гӧра йылын оз вотӧ,
Оз вотӧ, оз вотӧ,
Мича нылӧй, Машӧй, оз вотӧ.

Сылӧн дозйыс и тыри,
Сылӧн дозйыс и тыри,
И тыри, и тыри,
Мича нывлӧн, Машӧлӧн, тыри.

Гортас Маша мӧдӧдчис,
Гортас Маша мӧдӧдчис,
Мӧдӧдчис, мӧдӧдчис,
Мича нылӧй, Машӧй, мӧдӧдчис.

Зонмыскӧд паныд лои,
Зонмыскӧд паныд лои,
Лои, лои, лои,
Мича нылӧи, Машаӧй, лои.

– Здорово пӧ, мусукӧи,
Здорово пӧ, мусукӧи,
Мусукӧй, мусукӧи,
Мича нылӧи, Машаӧй, мусукӧй.

ШОНДІӦЙ МАМӦЙ

– Шондіӧй мамӧй дай,
Вердысьӧй аньӧй,

Дыр вӧд новлӧдлін дай,
Регыд рӧдитін.

Матӧ вӧд кӧсйин дай,
Ылӧ вӧд сетін.

Ылі земляӧ дай,
Тӧдтӧм семьяӧ,

Ӧтик во олі дай,
Мамӧс эг аддзыв.

Мӧд во олі дай
Мамӧс эг аддзыв.

Коймӧд во олі дай,
Гӧститны муні.

Кузь вӧраинті дай,
Паськыд полеӧд.

Мам воча воис дай,
Мам нылӧс эз тӧд.

– Шондіӧй нылӧй дай,
Кӧн мича яйыд?

– Вердысьӧй аньӧй дай,
Кулакӧн нӧйтіс.

– Шондіӧй нылӧй дай,
Кӧн югыд вирыд?

– Вердысьӧй аньӧй дай,
Плетьӧн вӧд нӧйтіс.

Плеть сер вӧд муніс дай,
Кокулам лэччис.

– Шондіӧй нылӧй дай,
Кутшӧм айкаыд?

Кутшӧм айкаыд дай?
– Рӧдимӧй бать кодь.

– Шондіӧй нылӧй дай,
Кутшӧм энькаыд?

Кутшӧм энькаыд дай?
– Рӧдимӧй мам кодь.

– Шондіӧй нылӧй дай,
Кутшӧм верӧсыд?

Кутшӧм верӧсыд дай?
– Лютая змея!

РЫТЪЯ ШУ КАДӦ, МАТУШКА

Рытъя шу кадӧ, матушка,
Менӧ рӧдитін.

Асъя шу кадӧ, матушка,
Менӧ мӧдӧдін.

Лэбзя, шу лэбзя, матушка,
Сӧкӧл–тицаӧн.

Пукся, шу пукся, матушка,
Да зелён садйӧ.

Аддза, шу аддза, матушка,
Ассьым мусукӧс.

Босьта, шу босьта, матушка,
Аслым нэм кежлӧ.

НЫВ ВАЛА ЛЭЧЧӦ

Ныв вала лэччӧ,
Ныв вала лэччӧ да,
Чай вала лэччӧ.

Чай вала лэччӧ,
Чай вала лэччӧ да,
Зонмӧс юкталӧ.

Зонмӧс юкталӧ,
Зонмӧс юкталӧ да,
Вылас пукалӧ.

Вылас пукалӧ,
Вылас пукалӧ да,
Меліа сёрнитӧ.

Меліа сёрнитӧ,
Меліа сёрнитӧ да,
Ласков ӧд вӧлі.

САД ЙӦРЫН ПӦ НЫВ ГУЛЯЙТӦ

Сад йӧрын пӧ ныв гуляйтӧ,
Сэтчӧ зон волывлӧ,
– Зонмӧй, зонмӧй, молодечӧй,
Шоча тай волывлан.

– Зонмӧй, зонмӧй, молодечӧй,
Шоча тай волывлан.
– Рад пӧ эськӧ ме вола да,
Нинӧмӧн козьнавны.

Туй кӧ воссяс, Питер ветла,
Дона козин вая,
Дона козин, кык козин да:

Составитель сборника песен П.И.Чисталев, видимо, не знал, что автором исходного текста этой песни был Петр Клочков, и позднее в народном исполнении песня несколько видоизменилась.

Кумач да китайка.

– Китайкасӧ ог новлы да,
Кумачсӧ ог пасьтав,
Кыдз любитан, сідз любит да,
Босьт мем зарниа чунькытш.

– Зарниа чунькытш, кык чунькытш да,
Мед ещӧ чунь серти,
Черевички да башмачки,
Мед ещӧ кок серти.

МУНІС ӦД СІЙӦ

Муніс ӧд сійӧ да зэв–зэв ылӧ,
Нуис ӧд сійӧ да мелі кывсӧ.

Колис ӧд сійӧ да зарни чунькытш,
Луннас ме сійӧс водз чуням новлі.

Войын ме сійӧс юр улам пукті,
Асъя ӧд чеччи синва банӧн мысси.

Вӧлі ӧд сылӧн кык пукӧвӧй пӧдушка,
Быдса ӧд сійӧ синва банӧн кӧтасис.

Вӧлі ӧд сылӧн собольнӧй ӧдьдяла,
Менсьым эз шонты да морӧсӧс–яйӧс.

Лэбис ӧд сійӧ да зэв–зэв ылӧ,
Лэбис ӧд сійӧ да ас милӧй дорӧ.

ГАЖА НӦРЫСЫН

Гажа нӧрысын, джуджыд коз йылын
Сьылӧ колипкай менам юр весьтын.
Ой тэ, колипӧй, сьылан мый йылысь,
Кутшӧм шуд йылысь, кутшӧм гаж йылысь?

Он тай шуд йылысь, колипкай, тэ сьыв,
Он тай гаж йылысь, дона пӧтка, сьыв.
Кӧсйывлі и ме кыпыд гӧлӧсӧн
Сьылан горӧдны асъя кыалы.

Кӧсйылі и ме сьывны гажаа
Визув шор дорын рытъя кыалы.
Эз тай гажа нет, гӧлӧс мытшасис,
Долыд лунӧ тай нитшкӧн нитшасис.

Векни шоръястӧ потшӧн потшӧны
Мед оз дзольгыны, водзӧ визувтны.
Ӧні лыддьӧ кӧк менсьым воясӧс,
Но ме эска век шӧнді югӧрӧ.

МЕ ТАЙ, МЕ ТАЙ, МИЧА ЗОН

– Ме тай, ме тай, мича зон,
Машукӧс виччыся,
Талун мыйкӧ дыр эз во,
Эз–ӧ менӧ вунӧд?

– Эг жӧ, эг жӧ ме вунӧд
Татшӧм мича зонмӧс,
Вунӧдны кӧ думайті,
Талун татчӧ эг лок.

Талун сёр нин пӧраыс,
Гортӧ колӧ мунны,
Гортын мӧсъяс лысьтытӧм,
Мамӧ менӧ видас.

Синва нетӧ мича зонлӧн –
Окота окасьны.
– Окота кӧ тэн окасьны,
Вай зарниа чунькытш!

– Зарниа чунькытш ме ог сет,
Сійӧ менам абу!
Со, коло кӧ, чышъян босьт,
Тожӧ ӧна мича!

– Но пасибӧ жӧ тэныд,
Мича муса зонмӧ!
Шонді лэччӧ нин увлань,
Сэсся муна гортӧ!

– Вот и верит кывъяс вылӧ,
Мый найӧ вӧчасны:
Чышъян босьтнысӧ босьтіс,
А мекӧд оз окась!

ЧУЖМӦР НЫЛӦЙ, ЧАБАНӦЙ

– Чужмӧр нылӧй, чабанӧй, чабанӧй,
Кӧні тэнад вала туйыд, вала туйыд?
– Баидӧг баксан шор дорын, шор дорын,
Менам вала туйӧй, вяла туйӧй.

– Чужмӧр нылӧй, чабанӧй, чабанӧй,
Кӧні тэнад песла туйыд, песла туйыд?
– Дозмӧр котсан яг дорын, яг дорын
Менам песла туйыд, песла туйыд.

– Чужмӧр нылӧй, чабанӧй, чабанӧй,
Кӧні тэнад турун туйыд, турун туйыд?
– Тури пуксян нюр дорын, нюр дорын,
Менам турун туйыд, турун туйыд.

– Чужмӧр нылӧй, чабанӧй, чабанӧй,
Кӧні тэнад оланіныд, оланіныд?
– Мича–мича ю дорын, ю дорын
Менам оланінӧй, оланінӧй.

ЧУЖМӦР НЫЛӦ, ЧАБАНӦЙ  по книге Георгия Лыткина

ПАСЬКЫД ГАЖА УЛИЧА

Паськыд гажа улича, улича,
Доли–шели, ноли–шели,
Говоринскӧй улича.

Уличаас ныв олӧ, ныв олӧ,
Доли–шели, ноли–шели,
Говоринскӧй ныв олӧ.

Ныв дорас пӧ зон волӧ, зон волӧ,
"Зонмӧй, зонмӧй, мый волан, мый волан?
Менӧ батьӧ кыйӧдӧ, кыйӧдӧ,

Менӧ мамӧ пинялӧ, пинялӧ,
Мун жӧ талун бӧр гортад, бӧр гортад,

Коми писатель и критик Павел Доронин считал автором исходного текста этой песни поэта Петра Клочкова.

Коркӧ, гашкӧ, аддзысьлам, аддзысьлам,

Гырысь луксӧ весалам, весалам,
Посни луксӧ шыблалам, шыблалам,
Град костас пӧ окасям, окасям!"

ВОТЫСЬӦЙ ДА ВОТЫСЬӦЙ

– Вотысьӧй да вотысьӧй,
Мый пуин да пӧжалін?
– Пирӧг нянь да черинянь,
Йӧла шыд да яя шыд.

Гӧститны тай эн волы,
Сарапан корсьны ветлі!
Вышивайтӧм сарапан,
Вышивайтӧм нагрудник.

– Ой буръясӧй, зонъясӧй,
Мыйнӧ тіянлы колӧ?
– Тувсов калинкор дӧрӧм,
Табактор да истӧгтор.

– Ок буръясӧй, зонъясӧй,
Вывті тіян жаль лоӧ,
Вывті рӧскоднӧ лоӧ,
Ок зонъясӧй, зонъясӧй.

МЕ ГУЛЯЙТІ ЛУН ДА ВОЙ

Ме гуляйті лун да вой,    (2– ысь)
Гортӧ локті яръ югыд.
Гортӧ локті яръ югыд,     (2– ысь)
Мамлӧн начыс ваймӧма.
Мамлӧн начыс ваймӧма,   (2– ысь)
Пӧсь пирӧгыс петӧма.
Пӧсь пирӧгыс петӧма,     (2– ысь)
Самӧварыс пузьӧма.
Самӧварыс пузьӧма,       (2– ысь)
Батьӧ локтӧ удж вылысь.
Батьӧ локтӧ удж вылысь,  (2– ысь)
Сочӧ локтӧ войпукысь.
Сочӧ локтӧ войпукысь,    (2– ысь)
Вокӧ локтӧ ворсанысь.

РУЧ КУ ДА КӦЧ КУ

Руч ку да кӧч ку,
Коймӧдыс соболь ку.

Базар вылӧ муніс
Казакӧс медавны.

Казак сылы сюри,
Казакыс гӧтыртӧм,

Казак веж юрсиа
Сарай дорас петас,

Нывъясӧс мигайтӧ,
Кӧзяйкаыс видчӧ,

Вӧв юктавны тшӧктӧ,
Лӧз мореӧ ыстӧ.

Вӧв юктавны лэччис,
Лӧз мореӧ воис,

Стременаыс уси,
Домыс пӧ кӧтасис...

НЫВЪЯСӦЙ ПӦ, НЫВЪЯСӦЙ

Нывъясӧй пӧ, нывъясӧй да,
Роч акань кодь нывъясӧй,

Роч акань кодь нывъясӧй да,
Роч сӧкӧл кодь зонъясӧй,

Йикиа чомӧр кодьӧсь да,
Рудзӧг пызя пув кодьӧсь,

Юмов кӧ, кампет кодьӧсь да,
Курыд кӧ, вина кодьӧсь,

Еджыдӧсь кӧ, рысь кодьӧсь да,
Вираӧсь кӧ, оз кодьӧсь,

Нывъясӧй пӧ, нывъясӧй да,
Роч акань кодь нывъясӧй.

ӦКСИНЬЯ ПӦ КРАСА

– Ӧксинья пӧ краса,
Ивановна пӧ краса,
Батьыд корис гӧститны,
Чӧскыд сурсӧ юны.
– Ог, ог, ог мун!
Подулӧй постӧм,
Юрвылӧй вевттӧм,
Бокӧй стынтӧм,
Арся войыс пемыд,
Арся лысваыс кӧдзыд.

– Ӧксинья пӧ краса,
Ивановна пӧ краса,
Мамыд корис гӧститны,
Чӧскыд сурсӧ юны.
– Ог, ог, ог мун!
Подулӧй постӧм,
Юрвылӧй вевттӧм,
Бокӧй стынтӧм,
Арся войыс пемыд,
Арся лысваыс кӧдзыд.

– Ӧксинья пӧ краса,
Ивановна пӧ краса,
Другыд корис гӧститны,
Чӧскыд сурсӧ юны.
– Муна, муна!
Подулӧй поска,
Юрвылӧй вевта,
Бокӧй стына,
Арся войыс югыд,
Арся лысваыс шоныд!

ЧИКЫШӦС КОЛӦ КЫЙНЫ

Чикышӧс колӧ кыйны да,
Садӧкӧ колӧ йӧртны.

Садӧкӧ колӧ йӧртны да,
Кӧйдысӧн колӧ вердны.

Кӧйдысӧн колӧ вердны да,
Вердысьыс быдмытӧм.

Кӧрткерӧсын быдмӧма да,
Кӧрт пос кузя локтӧма.

Йӧзлы ӧд абу лӧсьыд да,
Аслым ӧд сӧмын лӧсьыд...

Стӧкан юа, кыкӧс юа.
Юрын кутас шумитны,

Кор ме сабри вузала,
Кык шайта гудӧк босьта да,

Гудӧксӧ кӧ паськӧдла,
Сьывнысӧ кӧ горӧдла да.

ШОНДІБАНӦЙ ОЛӦМАНӦЙ

Шондібанӧй олӧманӧй,
Том олӧмӧй, том гажӧй.

Том олӧмӧй, том гажӧй да,
Том пӧра коллялӧмӧй.

Том пӧра коллялӧмӧй да,
Кытчӧ сійӧ кольӧма?

Кытчӧ сійӧ кольӧма да,
Некытчӧ абу кольӧм.

Некытчӧ абу кольӧма
Ставсӧ асьным ладайтам.

Ставсӧ асьным ладайтам да,
Ставсӧ асьным гуляйтам.

КОЗЙӦ, КОЗЙӦ

– Козйӧ, козйӧ, мый сулалан?
Ме ӧд тэнӧ пӧрӧда,

Ме ӧд тэнӧ пӧрӧда да,
Пескӧ керала,

Пескӧ керала да,
Пачӧ ломта,

Кыз ӧгырӧ уськӧда да,
Сё блин пӧжала,

Вӧсни ӧгырӧ уськӧда да,
Сё печенча пӧжала.